60. De Conceptione Beatae MV.
Ad Laudes.

1. Praesens dies expendatur
In eius praeconium,
Cuius conceptus laudatur

Salutis initium
Et a mundo memoratur
In caelorum gaudium.

2. Dies, praeco dulcis ortus,
Celebratur hodie,

Mariae, quae fuit portus
Salutis et gratiae

Et deliciarum hortus,
Rore plenus gloriae.

3. Ergo laudes in hac die
Concinat ecclesia,

Qua mater sacrae sophiae
Inspirante gratia

Concipitur, huius viae
Perdux stella praevia.

4. Haec est nova genitura,

Quae novum dat gaudium,

Dum factorem creatura
Traxit ad conubium,

Quo mors morte peritura
Virtutis dat praemium.

5. Virga florem conceptura
Dono sancti spiritus,
Stella solem paritura,

Quo Vae patet exitus,

Annae ventris intrat rura,

Mundo datur caelitus.

6. Hanc perfudit ros novellus,
Intra carnis horrea
Maduit ut quondam vellus,

Sicca tamen area,
Cum concepit dote tellus
Manente virginea.

7. Columba, quae adportavit

Ore virens lilium,
Per quam Christus mitigavit

Inundans diluvium,
Haec est virgo, quae lactavit

Portans Dei filium.

8. Rectori hierarchiarum

Laus, honor sit simplici,

Qui numero personarum
Distinguitur triplici,

Vultu et gloria quarum
Mereamur refici.