Sermo IX .

Item, sermo fratris Bonaventurae editus Viterbii in domo Praedicatorum, coram Fratribus in Capitulo.

Videbit omnis caro salutare Dei, Lucae tertio .

Fratres mei, quanta sit luciformitas, pulcriformitas, amoenitas et utilitas in speculatione et perpetratione sapientiae, ipsa Sapientia aeterna testatur Proverbiorum octavo : Beatus homo, qui audit me et qui vigilat ad fores ostii mei; qui me invenerit inveniet vitam et hauriet salutem a Domino. Nullus etiam se nolens disponere de hoc excusari valet, quia dicit Philosophus primi Ethicorum , quod felicitas intellectus scientiae est quoddam bonum, quod possibile omnibus non orbatis pervenire ad virtutem. Eapropter bonum et conferens nobis est verbum sanctae Scripturae intendere. Ut ergo digne et utiliter aliquid dicere et audire possimus etc.

Videbit omnis caro etc.

"Visio Verbi incarnati est tota merces nostra ". Salus eius est vita nostra, quod quidem vocatur salutare nostrum et divinitus nobis missum, quia universaliter curat a peccati deformitate; Genesis quadragesimo nono : Salutare tuum exspectabo, Domine.

Liberat a persecutionis crudelitate; Actuum ultimo : Gentibus missum est hoc salutare Dei, et ipsi audient .

Exuit ab aeternae mortis horribilitate; Lucae secundo: Viderunt oculi mei salutare tuum.

Introducit ad beatae vitae aeternitatem; Psalmus : Magna est gl oria eius i n salutari tuo.

Visio autem eius sive ipsius faciei aspectus beatificat universaliter purgando omnem errorem lumine infallibilis veritatis; Psalmus : In lumine tuo videbimus lumen.

Fugando omnem dolorem dulcedine inexplicabilis suavitatis; Ecclesiastae undecimo: Dulce lumen, et delectabile est oculis videre solem.

Terminando omnem laborem quiete interminabilis tranquillitatis; Isaiae sexagesimo : Tuncvidebis et afflues, et mirabitur et dilatabitur cor tuum etc.

Evacuando omnem timorem certitudine immobilis securitatis; Isaiae ultimo : Videbitis, et gaudebit cor vestium.