56. (41.) In Purificatione B.M.V.

1. Laetetur omne saeculum
Veritatis reditum,

Diei penset pretium,
Retractet mysterium,

Templo Deus pro homine
Praesentatur hodie.

2. Magnus ante luciferum
Et mundi principium

Fit parvus, fit infantulus
Verus, non phantasticus,

Ex custodita virgine
Factus est mirifice.

3. Dives rex sine tempore
Fit pauper in tempore,
Caeli sedens palatio

Nascitur in stabulo,
Virgo, mater et baiula,
Nulla ibi altera.

4. Nutritur et vivificat,

Crescit, qui magnificat,

Datis oboedit legibus
Subditus parentibus,

Deus creator omnium
Iussa complet hominum.

5. Mira haec dispensatio,
Mira haec dignatio !

Non lucens, sed lucibilis,
Deus invisibilis

Videtur in praesaepio,
Virginis in gremio.

6. Legem servat purissimus,
Ne oblatret impius,

Sicut in lege scribitur,
Infans circumciditur,

Servantur dies provide
Et complentur hodie.

7. Maria, sancta femina,
Virgo integerrima,

Nullis tacta excessibus
Nihil debet legibus ;

Iussa servat legalia
Pro peccatis habita.

8. In templo mater puerum
Laeta ducit plurimum,

Praesentat Deo filium,
Ipsum Deum inclitum,

Columbas atque turtures
Offert Deo supplices.

9. In columba dilectio
Mutua perpetuo,

In turture est castitas
Geminaque sanctitas,

Haec quia virgo meruit,
Haec offerre debuit.

10. Hunc Simeon ut aspicit
Iustus, ulnis accipit,
Dimitte, dicit, Domine,

Me in pace hodie,
Viderunt oculi mei
Salutare Domini.

11. Paratum omni populo,

Longinquo et proximo,

Omnium lumen gentium,
Gratia et praemium,

Lumen et plebis gloria
Israel non modica.

12. Omnes gentes, accedite,
Cernite et credite,

Lumen inaccessibile,
Lumen invisibile

Apparet et illuminat
Et in templo rutilat.

13. Videte, omnes populi,

Omnes Christum Domini,

Deum, lumen de lumine,
Accurrentes sumite,

Accedite, precamini
Et illuminamini.

14. Ferte lumen in cordibus
Hoc diebus omnibus,

Luceat corpus actibus,
Ferte lumen manibus,

Candelas manus teneant,
Ut obscura pereant.

15. Hoc lumen cor illuminet,
Et hoc corpus rutilet,

Ut mente atque corpore
Clarefacti optime

Laudetis Deum plenius
Vestris in operibus.

16. Hoc lumen est altissimus
Summi patris filius,

Puer iste tenerrimus
Deus est interminus,

Dierum antiquissimus,
Primus et novissimus.

17. Hoc lumine castissima
Genetrix dignissima,

Hoc lumen ventre pertulit,
Hoc intacta peperit,

Istud ad templum detulit,
Simeon hoc extulit.

18. Quibus te, virgo, laudibus
Efferam in talibus,

Mens nescit, sermo deficit,
Stupor sensum eximit,

Filium habens, domina,
Non per viri opera.

19. Moti sunt dialectici

Victi sunt haeretici;
Concubuit, si peperit,
Syllogismus periit,
Mundana sapientia
Victa est a femina.

20. Sion, adonia thalamum
Et intende canticum,
Surge, appare fulgide,

Christum regem suscipe,
Quem virgo mater genuit,
Virgo mater peperit.