60. De sancto Antonino.
Ad Noct. et Laudes.

1. Dies sacratus inclito
Antonini martyrio
Anni reducto circulo
Festum reddit in saeculo.

2. Laetetur grex humillimus,
Clerus uterque, populus
Festum recolat laudibus,
Claris ornet operibus.

3. Gestorum hic miracula
Christi perquirens lucida,
Spernendo mundi lubrica
Orbis lustravit climata.

4. Doctus voce dominica
Mundi contempsit gaudia,
Hostis vincens tripudia
Colli suscepit jugula.

5. Ignotus latens saeculo,
Deo notus tantummodo,
Annorum per curricula
Plura transegit tempora.

6. Urceolum cum sanguine,
Caput abscissum corpore
Savinus doctus somnio
Invenit in puteolo.

7. Dum ducitur ad tumulum,
Conspicitur miraculum,
Gutta profluxit sanguinis,
Ut daret fidem populis.

8. Cui tota plebs gratissima
Laude resultat debita
Ovantes suo tempore
Hoc revelato corpore.

9. Advenientes morbidi
Curantur, simul languidi,
Florent virtutes variae
Martyris Christi munere.

10. Nos quoque tui famuli
Precamur omnes cernui,
Ut tuis tuti precibus
Cunctis purgemur noxiis.

11. Auferto, quod deliquimus,
Conferto, quae deposcimus,
Ut nos commendes Domino
Hoste devicto pessimo.

12. Praesta, beata trinitas,
Concede simplex unitas,
Ut nostra per solemnia
Tibi sit laus et gloria.

Cl. De s. Antonio Eremita.

1. Confer alternis personare vocis
Organis, alme cordium solator,
Incliti tui eremi cultoris
Vitae peracta.

2. Fere vigenos consummarat annos,
Inclita prole generosus exstans,
Cum sibi callem vendicat polorum
Indice Christo.

3. Audito sancto illico mandato,
Impiger aegris cuncta deputavit
Sponteque sua corpora devexit
Montis ad antra.

4. Ubi non pingues gestiebat victus,
Non vina dulci liquorata melle,
Simul et vestes fulgide contextas
Ultro projecit.

5. Tenui pastu pellebatur fames,
Amnis fluenta poculum praestabant,
Tegmine vili frigus arcebatur
Archimandritae.

6. Cbristi qui plenus opere pollebat,
Sobrius, castus coelicis adstabat
Choris, o quanta mira satagebat
Pro caritate.

7. Perpetim sacros macerabat artus,
Quo longe turpans exsularet luxus,
Crebra contorquens viscera jejunio
Clausus in antro.

8. Tartari turmae invasere pium,
Flammam vomentes fremitu funesto,
Passimve diris ictibus urentes
Famulum Dei.

9. Fortis athleta fide loricatus
Spernit deliros daemonum furores
Atque deridet minas et rugitus
Mente secura.

10. Mirum in modum caritate fervens
Vasta per loca monachos adibat,
Pectora quorum arida fovebat
Famine sacro.

11. Cum jam ad astra victor coronatur,
Undique currunt coetus monachorum,
Lacrimis plenis osculando pedes
Patris beati.

12. Trinitas alma semper collaudetur,
Christo sit decus gloriaque digna,
Patris Antoni meritis juvemur,
Pater aeterne.