SERMO LX.

DE S. TRINITATE.

Benedicamus Patrem et Filium cum sancto Spiritu, etc.

I.

Nota, quod benedicendus est Pater : quia Filium suum unigenitum misit et dedit. Unde Isa. IX, 6 : Parvulus natus est nobis, et Filius dalus est nobis.

Dedit autem Pater Filium ad tria, scilicet in socium nostrae fatigationis. Unde Paulus loquitur de Filio (ad Hebr. ii, 17): Debuit per omnia fratribus similari, ut misericors fieret. Christus in humana natura quam assumpsit de Virgine, passus est nostras poenalitates, scilicet esuriem, sitim, frigus, et aestum, lassitudinem et mortem, ut per experimentum eorum facilius hujusmodi compatiatur.

2. Dedit etiam Pater Filium in pretium nostrae redemptionis. Unde Apostolus ad Rom. VIII, 32 : Qui proprio filio suo non pepercit, sed pro nobis omnibus tradidit illum.

Dedit etiam eum in viaticum nostrae peregrinationis. Unde ipse filius dicit de seipso, Joan. VI, 51 et 52 : Ego sum panis vivus qui de coelo descendi : si quis manducaverit ex hoc pane, vivet in aeternum. Unde et ipe in coena sedens cum discipulis instituit sacramentum corporis et sanguinis sui, ut hoc a fidelibus et infirmis in via hujus exsilii, quasi pro viatico habeatur.

II.

Benedicendus est etiam Filius, quia venire voluit. Unde legitur in Isa. VI, 8, quod cum dixisset Pater : Quem mittam, et quis ibit ex nobis ? Respondit Filius : Ecce ego, mitte me.

III.

Benedicendus est etiam Spiritus sanctus, quia ad hoc ut Filius incarnaretur et mitteretur, consilium dedit, et cooperator bonus fuit. Unde dicitur in Genes.

xxii, 2, quod Angelus, id est, Spiritus sanctus dixit ad Abraham, id est, ad Patrem : Tolle filium tuum unigenitum, quem diligis, Isaac, id est, risum vel gaudium : quia in nativitate ejus gaudium ab Angelis nuntiatum est, et offer illum in holocaustum, etc, id est, illum in monte Calvariae pro mundi salute crucifigi permitte, etc.