59. In Assumptione BMV.

1. Gaude, Christus cum levavit
Te in carne et locavit
Super astra, obviavit

Tota coeli curia.
Gaude, virgo singularis,
Ut prae cunctis sublimaris,
Sic et digne plus laudaris

In coelesti gloria.

2. Gaude, virgo, quae decore
Ornas coelum lucis more,
Velut cuncta sol splendore

Superat lucentia.
Gaude, cui angelorum
Chori parent et sanctorum
Ut reginae ac votorum

Exhibent obsequia.
3. Gaude, quod vis esse ratum,
Tuo nato exstat gratum,
Omnem tuumque precatum

Explet cum clementia.
Gaude, qui te venerantur,
Tua laude delectantur,
Hi per Christum munerantur

In superna patria.

4. Gaude, summe coronata,
Carnis dotibus ornata,
Christi dextris sociata,

Regnans super omnia.
Gaude, semper quae frueris
His deliciis sinceris,
Ut in aevum jucunderis

Summa cum laetitia.
5. A me mundi jam evelle
Gaudia permixta felle,
Immo me tuorum melle

Gaudiorum satia.
Veni, virgo, da laetari,
Me in te nunc consolari
Et in fine gratulari

Tua de praesentia.
6. Dona mihi te videre,
Semper tibi congaudere
Ac Iactanter possidere

Beatorum praemia.
Ecce, tibi congaudemus,
O Maria, ut amemus
Te in aevum et laudemus,

Duc nos ad coelestia.