61. In Festo Mariae Nivis.

In 1. Vesperis.
Antiphonae.

1. Lucis candor sempiternae,
Castitatis, speculum,
Virgo benigna,

Mater gratiae supernae
Grande dat miraculum

Novaque signa.
2. Virgo nivei pudoris,

Nitens intus, candens foris,

Nivem dat ab aethere,

Mater nostri salvatoris,
Quando tempus est ardoris,
O mirum prae ceteris I

3. Roma stupet et miratur,
Dum nix in aestate datur

Prorsus praeter morem,
Quid praetendat, ut sciatur,
Candens flos interpretatur

Vitae dans odorem.

4. Ut nix alba leniter

Descendit de superis,
Sic virgo pura dulciter
Infudit dona miseris.

5. Quem in terris consolatur
Candida virginitas,
Super nivem dealbatur
Ejus mentis puritas.

R. Dominus rex omnium

Vas sibi puritatis
Praeelegit solium,

Donum majestatis,
Spiritus sacrarium,

Templum trinitatis,
Ut purgaret lolium

Nostrae pravitatis ;
V. Candidior nive

mater est haec virgula Jesse.
Nimis proclive

Deus hic sibi contulit esse.

Ad Magnificat.

A. O virgo christifera

Nimis dealbata,
O vitis fructifera,

Prole fecundata,
Ad laudem tui nominis,
Mater Dei hominis,

Templum praemonstrasti,
Media dum in aestate
Nivis monstrans densitate

Locum praesignasti;
Colentes haec prodigia,

O mater aevitatis,
Duc tua per vestigia

Ad regnum claritatis.

Ad Matutinum.
Imitatorium.

Imperatoris omnium
Festa colentes nivium
Praedulci vocis jubilo
Nunc jubilemus Domino.

In 1. Nocturno.
Antiphonae.

1. Templum virginis beatae
Nix demonstrat in aestate,
Roma datur in stuporem
Nive candens praeter morem.

2. Duo simul opposita

Jungit eodem tempore.,
Aestiva namque caumata
Stant cum nivis frigore.
3. Templi cinxit ambitum
Nivis densitate
Potestate divina,
Et per templi spatium
Solis claritate

Jacet nix, pruina.

Responsoria.

1. Ad honorem inclitae

Virginis Mariae
Venit nix cum frigore

Aestivali die,
Roma stupet et laetatur

Tanto Dei miraculo,
Templum aedificatur

Virginis sub titulo.
V, Templi structura

monstratur virgine pura.
2. Dum rota solis volvitur

In sphaera virginali,
Quando tellus uritur

Fervore aestuali,
Aer gelu stringitur

Supernaturali,
Imber simul funditur

Cum aqua niveali,
V. Signa per insueta

fit plebs Romanaque laeta.

3. Candor nivis densitate
Virginis immaculatae
Signat castitatem,
Quod descendit in aestate,
Signat in necessitate
Matrem caritatis.
V. O mitis, casta

virgo, petentibus asta.

In 2. Nocturno.
Antiphonae.

1. Christo regina adstitit

A dextris dealbata,

Thronus regis exstitit

Veste deaurata.
Sole est circumamicta
Mater illa benedicta.

2. Nix descendens caelitus
Urbem laetincavit

Grande per miraculum,
Johannes patricius
Decorum fabricavit
Mariae tabernaculum.

3. Nix per gyrum penitus
A populis inventa
Monstrabat divinitus
Templi fundamenta.

Responsoria.

1. Summum pontificium

Liberius tenebat,
Johannem patricium

Tum felix habebat
Urbs, visionem similem

Uterque praevidebat,
Quae locum mox praenobilem

Eis ostendebat.
V. Templum fundantes,

reginam glorificantes.

2. Calor solis aestuat
Sub signo virginali,
Terram nive refrigerat
Supernaturali
Genetrix beata;

V. In calore nimio
Adest refrigerio
Supplex invocata.

3. Ut nix de caelo veniens

Illuc non revertitur,
Terra vero sitiens

Per ipsam infunditur,
Sic Mariae gratia

Praeveniens in mentem
Nunquam venit vacua,

Sed reficit egentem,
Ut amplius proficiat
V. Germen virtutis,

fructum gignendo salutis.

In 3. Nocturno.
Antiphonae.

1. In Selmon monte Domini
Nive dealbantur,
Qui amore fervidi
Deum contemplantur.

2. Omnis terra, Alleluja
Domino cantate,
Qui nivis refrigeria
Dedit in aestate.

3. Tu, virgo christifera,
De novo fervore
Cor aridum refrigera
Niveo candore.

Responsoria.

1. Gedeonis quondam vellus
Rore caeli maduit,
Sicca tamen mansit tellus,

Sicut cunctis placuit,
Sic nec fuit irrigata
Dei genetrix beata,
Quando Deum genuit ;
V. Virgineo more

capit hunc Gabrielis ab ore.

2. Plebs Romana concurrebat,
Signum enim cum videbat,
Laudem Deo retulit,

Papa terram confodebat,
Ut per gyrum nix jaeebat,
Terra se aperuit.
V. Persolveris vota

pia plebs est, concio tota.

3. Pontifex egregiam
Consecrat basilicam

Sub titulo Mariae,
Ubi corpus tumulo
Quiescit sub altario

Apostoli Matthiae;
Ibi aegroti confluunt,
Plebis et cleri resonant

Praedulces melodiae.
V. Laetifica mentes

tua, virgo, festa colentes,
Culparum sentes,

pungunt quae, tolle nocentes.

Ad Laudes.
Antiphonae.

1. Gaude, chorus civium
Caelestis monarchiae,
Adsunt festa nivium
Virginis Mariae.

2. Haec est mater honorata
Nata veri David,
Haec est pulchra Noemi,
Quam Booz adamavit.

3. Haec est urna aurea,

Quae manna receptavit,
Haec funda veri Davidis,
Quae cum jactu lapidis
Goliam prostravit.

4. Hanc area legis virginem

Diu praesignavit,
Haec Aaron virgula

Nuces procreavit.
5. Hanc vellus Gedeonicam
Et templum Salomonicum

Bene figuravit,
Hanc rigavit caeli ros,
Hanc Salomon pacificus

Caste subintravit.

Ad Benedictus.

A. O decus puellare,

Verbi Dei cella,
Per hujus mundi mare

Duc nos, maris stella,
Duc ad portum civitatis

In vita novella,
Ne nos torrens voluptatis

Mergat in procella,
O puella, fuga bella

Carnis, mundi, daemonis,
Da salutem et virtutem

Utriusque hominis.

In 2. Vesperis.
Ad Magnificat.

A. Humilitatem Dominus

Ancillae respexit,
In cunctis mulieribus

Hanc virginem dilexit,
Ex ea sibi habitum

Humanitatis texit,
Et per illius meritum

Hominem erexit
A mundi, carnis, daemonum.

Impetu protexit.