Sermo XII.

Item, sermo fratris Bonaventurae factus in Urbeveteri coram domino Papa Urbano et cardinalibus, in aula episcopatus illius.

Sic nos existimet homo ut ministros Christi et dispensatores mysteriorum Dei, primae ad Corinthios quarto .

In verbis his Apostolus, generalissimus praedicator et zelator animarum, hortatur praelatos Ecclesiae et in praelatis omnes subditos eorum, Christi fideles, ad vitae evangelicae veritatem et famae praeclarae celebritatem dupliciter: primo per comparationem ad Deum, secundo per comparationem ad proximum. Primum, ibi: Sic nos existimet homo ut ministros Christi, hoc est tales sitis in vita, quod omnis homo cogitet et habeat vos pro servis Christi. Secundum notatur, ibi: et dispensatores mysteriorum Dei, hoc est tales sitis in fama, quod omnis homo reputet vos fideles dispensatores officiorum vobis commissorum.

Circa haec notandum, quod iuxta Ecclesiae triplicem gradum, scilicet activorum, praelatorum et conte mpl ativoru m triplex debemus Deo ministerium tripliciter exhibere, si volumus veritati vitae evangelicae et celebritati famae respondere et ad similitudinem triplicis hierarchiae caelestis Deo in terra servire.

I. Nam ministrare Deo debent activi tripliciter, ut respondeant infimae hierarchiae, scilicet in operibus iustitiae per obsequia benevolentiae, per quod conformantur Angelis; Lucae quarto : Continuo surgens ministrabat illis.

In condescensionibus misericordiae per beneficia eleemosynae, per quod conformantur Archangelis; primae ad Corinthios ultimo : In ministerio sanctorum ordinaverunt se ipsos.

In exhibitionibus vatientiae per exercitia magnificentiae, per quod conformantur Virtutibus; secundae Petri primo: Ministrate in fide vestra virtutem.

II. Ministrare vero debent praelati tripliciter, ut respondeant mediae hierarchiae in caelo, scilicet in correctionibus censurae, per quod conformantur Potestatibus; ad Romanos decimo tertio : Dei enim minister vindex est in iram ei qui male agit.

In eruditionibus doctrinae, per quod conformantur Principatibus; secundae ad Timotheum ultimo : Opus fac evangelistae, ministerium tuum imple, sobrius esto.

In subventionibus spiritualis et corporalis indigentiae, per quod conformantur Dominationibus; primae ad Timotheum tertio : Qui bene ministraverint gradum bonum sibi acquirent.

III. Ministrare vero debent contemplativi tripliciter, ut respondeant hierarchiae supremae, scilicet in devotionibus gratiae, per quod conformantur Thronis; Genesis quadragesimo : Recordabitur Pharao ministerii tui et restituet te in gradum pristinum; primi Regum secundo: Puer Samuel ministrabat.

In laudibus reverentiae, per quod conformantur Cherubim; secundi Paralipomenon vigesimo nono : Vos elegit Deus, ut stetis coram eo et ministretis illi colatisque eum et cremetis ei incensum.

In oblationibus et ardoribus excellentiae, per quod conformantur Seraphim; Ioannis duodecimo : Si quis mihi ministraverit, honorificabit eum Pater meus .