60. De sancto Ketillo.

1. Ave, praeclara

matris uteri fecunditas

atque beata,

sancte Ketille.

2. Euge, decus lucis

flore primaevo

te splendificavit,

ut auri color

optimus ne mutaretur

aemula rubigine ;

3. Virtutum arte celsum

regendae curae

te praedestinavit

in virga, pane,

baculo, adiuncto cane

vigilis custodiae.

4. Te sanctum pneuma

deebriavit nectare

sanctae sophiae, verbum

fecit salutare

cunctis ructuare,

5. Te, cultorem vitae

probatum apostolicae,

militans canonicae

Augustini patris

sub vexillo regulae.

6. Tu ablutus fonte limpidissimo,

David reus criminis,

Dei dextram suspendens

vindicem

amica confessione.

7. Tu Augustinum perfudisti

magnum sacri mutua

consertione verbi

senectae

disiuncti successione.

8. Hinc fungi sacerdotio

datur sacro mysterio,

mediante labro Moysi

de mulierum facto speculis,

expiatus

tabernaculi ad ostium,

sollemnes mactans Deo

sacras hostias.

9. Hinc coccus bis intingitur,

offerri mox praecipitur,

in ornamento caritatis

amore coloratur geminae,

in fervore

Dei proximi concrematus

animus circa notos

atque discolos.

10. Fac in templi

base nos contemplari

tria figurata ;

boum, Cherubin,

leonum, celte perarata,

sanctus Ketillus

tulit ovibus

quaeque temporata.

11. Fac tanti

patris nos perfundi

benedictione,

qui permiscuit

tria tribus: clementi lenitate

severitatem,

plenitudine

scientiae germana.

12. Adae post

solvit debitum

cursu consummato

13. Stadii,

caelo commendans

spiritum optato.

14. Da salutem languentibus,

da tuis laudatoribus

portum tranquillae

15. Pacis, nam tuae gratias

magnalia fulgent mire,

sancte Ketille.

16. Christum interpella,

qui est Alpha,

via, finis ;

usitata

nos exutos vetustatis tunica

ad te facias transire.