61. Hymnus de regularibus et inprimis religiosis.

1. Vos, abbatesque priores,
Vos, monachique fratres,
Sitis pacis amatores
In unumque claustrales,
Sitis luce clariores,
Vos castae moniales.

2. Dum iucundi permanetis
Estis vosque iuvenes,
Vos servire procuretis
Sustinentes inopes,
Viam rectam praeparetis,
Sitis corde nobiles.

3. Est nimis virtus iuvenum
Deo acceptabilis,
Magis quam virtus senum
Deo est amabilis,
Qui se reducit devium,
Satis est laudabilis.

4. Servate vestram regulam
In sancta honestate,
Pellentes vanam gloriam
Ad Deum vos vacate,
Dat Deus vobis gratiam
In sancta caritate.

5. Terrena vos despicite
Servateque promissa,
Non sitis vos apostatae,
Implete vos commissa,
Vos in divinis agite,
Ut sitis digni missa.

6. Estis facti regulares
Vos Deo disponentes,
Praedicate populares,
Sint Deo servientes,
Sitis casti singulares
Honesteque gerentes.

7. Regulares ordinati
Sunt, ut regant alios,
Sint doctrina praedotati,
Ut reducant devios,
Submittant [se] sanctitati
Doceantque populos.

8. Odibilis apostata

Et damnandus creditur
Laudabilisque regula,
Si honeste geritur,
In ea vox angelica,
Dei laus canitur.

9. Divina suavissima,
Terrena sunt amara,
Superna perfectissima
Mundanaque caduca,
Caelestia clarissima,
Praesentia non clara.

10. Vos Deo vota reddite
Velitis oboedire,
Divina vos diligite
Timentes casum irae,
Vos in amore gerite,
Nolite vos abire.

11. Nam si regulam servatis
Gerentes vos prudenter
Et si Deum vos amatis
Curantes diligenter,
Vosmetipsos honoratis
Manentes congaudenter.

12. Vos Dominum diligite,
Vos sectantes semitas,
In luce Dei pergite
Dimittentes tenebras,
A Domino vos petite,
(Qui) praebet vobis gratias.