Sermo XIII .

Item, sermo fratris Bonaventurae factus Perusii in consistorio coram domino Papa Clemente et cardinalibus in aula episcopatus illius.

Sic nos existimet homo ut ministros Christi et dispensatores mysteriorum Dei, primae ad Corinthios quarto .

Hortatur in verbis istis Apostolus, universalis doctor, tam praelatos Ecclesiae quam omnes christianos eis subditos ad duo, scilicet ad angelicae conformitatis nobilissimum caelibatum et ad vitae claritatis laudabilissimum studium. Primum, ibi: Sic nos existimet homo ut ministros Christi; secundum ibi: et dispensatores mysteriorum Dei.

Notandum ergo, quod ut mereamur ab omnibus existimari ministri Christi, debemus in vita respondere Deo, in terra Angelis, ministris eius in caelo, per hierarchicam gratiam, ut simus conformes Angelis per sedulitatem fraterni obsequii; primae ad Corinthios ultimo : In ministerium sanctorum ordinaverunt se ipsos.

Archangelis per assiduitatem divini praeconii; secundi Paralipomenon vigesimo nono : Vos elegit Dominus, ut stetis coram eo et ministretis illi colatisque eum et cremetis ei incensum.

Virtutibus per victoriositatem domestici inimici ; secundae ad Corinthios sexto : In omnibus exhibeamus nosmetipsos sicut Dei ministros, in multa patientia, in trib ulationibus etc., in castitate, in scientia etc.

Potestatibus per fidelitatem divini zeli; primae ad Timotheum quarto : Bonus eris minister Christi Iesu, enutritus verbis fidei et bonae doctrinae, quam assecutus es.

Dominati onibus per nobilitatem ingenui animi; secundae ad Timotheum secundo : Labora sicut bonus miles Christi Iesu.

Thronis per uniformitatem stabiliti propositi ; secundae Petri primo : Ministrate in fide vestra virtutem, in virtute autem scientiam etc.

Cherubim per perspicacitatem sursum activi ingenii; Proverbiorum decimo quarto : Acceptus est regi minister intelligens.

Seraphim per incessabilitatem accensi desiderii; Psalmus : Qui facis Angelos tuos spiritus et ministros tuos ignem urentem.