QUAESTIO V.

Utrum sit procedere in infinitum in effectibus ?

Arist. 3. cap. 8. et 8. Physic. cap 2. D. Thom. 1. p. q. 46. art. 2. et q. 70. art. 3. et 4. Suar. disput. 29. Metaph. sed. 1. et Tom. 2. in 1 . p. disput. 177. Vasq. ibidem disp. 26. Conimb. 3. Physic, cap. 8. quaest. 2. a. i. et 8. Physic. c. 2. quaest. 7. Rubius 3. Physic. tract. 2. q. 3. Hurtad. disput. 13. Physic. sed. 2. et disp. 18. sed. 1.

Quod sic videtur, omnis differentia alicujus generis habet differentiam oppositam condividentem secum illud genus, sed finitum in actu est differentia quantitatis ; ergo habet infinitum pro differentia sibi opposita, et infinitum in actu ; non in potentia, quia differentiae oppositae non compatiuntur se, sed idem est finitum actu, et infinitum in potentia: ergo habet pro opposito infinitum in actu. Item 6. Topic. cap. 19. Aristoteles increpat definitionem lineae rectae, cujus medium superadditur finibus, quia infinita, neque finem, neque medium habet ; recta autem est linea, scilicet infinita, ergo non repugnat lineae rectae infinitas. Item, 3. Physic. text. comm. 69. quantam magnitudinem contingit esse in potentia, tantam contingit esse in actu ; sed in potentia contingit esse infinitam, quia 2. de Anima, text. c. 41. ignis crescit in infinitum appositis combustibilibus. Item, continuum est divisibile in semper divisibilia 6. Physicor. t. c. 3. sed numerus sequitur divisionem continui ex 3. Phys. t. c. 68. ergo numerus est infinitus. Dicitur quod hic est in potentia, sicut divisio. Contra hoc, primo de Caelo et Mundo, quod impossibile est factum esse, impossibile est fieri; ergo si impossibile est continuum esse divisum in infinitum, ergo impossibile est dividi in infinitum in potentia. Item quod dicitur de numero quod est in potentia infinitus quod actu, probatio ; concessum est quod infinitus in potentia, sed qualibet specie data, potest addi unitas, et causatur nova species: ergo species numerorum sunt infinitae in potentia, sed quaelibet species addit unitatem super aliam ; ergo alia species, quae est in potentia habet in se infinitas unitates, sed omnium specierum, quae possibiles sunt, ideae earum sunt in Deo actu ; ergo habet actu ideam alicujus speciei, vel numeri habentis unitates infinitas ; sed omnis species, cujus ideam habet Deus in actu, est factibilis a Deo in suo singulari: ergo aliqua species infinitas habens unitates, erit factibilis extra Deum. Contra, 3. Phys. text. com. 41. dicit Philosophus de numeris, quod omnis numerus est numerabilis, sed omne numerabile est pertransibile, et omne pertransibile est finitum, ergo, etc.