61. De sancto Laurentio.

1. Stola iucunditatis,

Alleluia,

2. Induit hodie Dominus

militem suum Laurentium.

3. Solito plaudat alacrius

contio laeta fidelium.

4. Hodie martyr insignis

hostiam Deo placentem

obtulit ;

5. Hodie tormentum ignis

graviter examinatus

pertulit.

6. Animatus ad certamen

monitu beati senis

7. Gravissimis non refugit

exhibere membra poenis.

8. Ante regem accersitur

et de rebus convenitur

occultis ecclesiae;

9. Sed non cedit blandimentis

emollitur aut tormentis

eius avaritiae.

10. Luditur Valerianus,

et levitae larga manus,

dum petit indutias,

11. Dat ministra caritatis

pauperibus congregatis

facultatum copias.

12. Furit igitur praefectus,

et paratur ardens lectus ;

insultantis viscera

crates urit aspera.

13. Sudat martyr in agone

spe mercedis et coronae,

quae datur fidelibus

pro Christo certantibus.

14. De cuius militia

caeli gaudet curia,

15. Quia vicit hodie

ministros nequitiae.

16. Ut hunc ergo per patronum

consequamur vitae donum,

17. In illius die festo,

chorus noster, laetus esto

18. Iucundum in ecclesia

decantans Alleluia.