62. De sancta Lucia.

1. Laudes debitas

Deo nostro reddamus,
socii, voce praeclara,

2. Qui stabilivit

prudentia omnium
creaturarum saecula

3. Et hodie cum sanctis
suis coronavit virginem
inclitam

4. In polorum sedibus

per palmam martyrii sanctam
Luciam.

5. Unde gaudium
et laetitia
caelestibus choris agitur,

6. Atque malignus
spiritus victus
inde torquetur et tristatur.

7. Nunc humili prece
menteque conscia
postulemus
istius beneficia

8. Invictae virginis
et inviolatae;
carissima
dicemus ei talia:

9. Tu, virgo clarissima,

sapiens Domini nostri sponsa,

10. Fulgens inter agmina
sanctorum Dei, o Lucia,

11. Altissimi patris
filium pro nobis
rogita,

12. Qui fragilis carnis
propter nos induit
pondera,

13. Ut in perpetuum nobis
impendat aeterna regna,

14. Ubi concinamus semper
refulgentes Alleluia.