65. In Translatione s. Nicolai.

In 1. Vesperis.
Super Psalmos.

A. Gaude plaudens,
fidelis contio,

Tantae laudis
dotata gaudio,

Nam lucerna

latens sub modio

Novae lucis

resplendet radio,

Dum antistes,

plebis victoria,
Iam per orbem

fulget in gloria.

Ad Magnificat.

A. O praesul egregie,

Limes aequitatis,
Doctor sapientiae,

Candor puritatis,
Auctor innocentiae,

Veniam peccatis
Apud thronum gloriae

Posce cum beatis.

Ad Matutinum.
Invitatorium.

Venite, magnifice

Iubilemus
Et pro tanto pontifice

Honorem demus
Domino.

Ad Nocturnum.
Antiphonae.

1. In lege Dei docilis

Studet clarus virtutibus
Puer, cunctis amabilis
Mundanis spretis opibus.

2. Constitutus in acie
Praesulum oraculo
Totum se confert gratiae
Christo vacans sedulo.

3. Doctor apostolicus,
Honor confessorum,
Est effectus caelicus
Civis angelorum.

Responsoria.

1. Gemma beatorum,

Nicolae, salus miserorum,

Inclite dux Christi,
dum transferri meruisti,

Dulcis odor manat,

tua virtus languida sanat;
V. Natum voce pia

flectas cum matre Maria.

2. Farris adauctus cumulus
Gentis supplet inopiam,
Aurique datus sacculus
Patris pellit tristitiam,
V. Tumbae sacrae
salubris rivulus
Nicolai

testatur gloriam.

3. Mundi decus, forma cleri,
Nicolae, norma veri,
Te quaerentes revereri

Iuva sanctis precibus
Apud Christum, regem tuum,
Ut conservet gregem suum

Iungens caeli civibus.
V. O maestorum

dulce solacium,
Cunctis pium

praesta subsidium.

In Laudibus.
Antiphonae .

1. Gemma decorem induit
Dudum lucens in gloria,
Cuius virtus exhibuit
Aegrotis beneficia.

2. Servite cum laetitia
Nicolao pontifici,
Videntes mirabilia

Multa per illum effici.

3. Terra suum protulit

Fructum praeter morem,
Dum pro flore contulit
Olei liquorem.

4. Hymnum Deo dicite
Flumine quassati,
Sancto benedicite,
Opi suae grati.

5. Praesul, salvator virginum,
Auctor pietatis,
Laudat in caelis Dominum
Fruens cum beatis.

Ad Benedictus.

A. Nicolae,

decus fidelium,
Virginalis

custos munditiae,
Vas virtutum,

candoris lilium,
Tuae pandens

sinum clementiae

Te quaerentes
duc post exsilium

Cum beatis
ad thronum gloriae

In 2. Vesperis.
Ad Magnificat.

A. O pastor, dulce bravium,

Desolatorum gloria,
Mentes illustrans omnium

Verbo, signis et gratia,
Translationis gaudium

Colentes cum laetitia
Transfer ad regni solium

Post huius vitae stadia.