60. De Beata Maria V.

1. Ave, virgo sapiens

Et matura,
Caro Deum pariens

Contra carnis iura,
Angelorum gaudium,

Pasce, cura,
Reorum remedium,

Manu tange pura,
Te gestantem brachia
Tua gestent, eia,
Tibi iungat basia

Dei genitura.

2. Cum infante loquere

Voce tuta,
Quo loquente libere

Lex silebit muta,
Ritus prisci Moyses,

Vultum muta,
Erubescat facies

Legis iam corruta.
Puer nobis natus est,
Cuius pater Deus est,
Cuius mater prorsus est

Virgo impolluta.

3. Quos abscondit regulus

In operto,
Noster iste parvulus

Traxit in aperto ;
Serpens factus aeneus

In deserto,
Quos vulnerat igneus,

Dono cura certo.
Ergo spreta Veneri
Vita simus pueri
Novatore miseri

Status iam reperto.