61. De Beata Maria V.

R. Nardus odorifera
Stillat arce supera,
Per quam fit puerpera
Virgo maris stella.

1. Thronus regis instauratur

Hodie puella,
Terra caelo fecundatur,

Fundunt caeli mella,
Mella, quibus irrigatur

Virginalis cella,
Novus liquor eliquatur

De vite novella.

2. Deus, qui cum Deo vivit,

Unius usiae,
Quem prae cunctis illinivit

Oleo sophiae,
Humanandus introivit

Uterum Mariae,
Humanatus nunc exivit

Clauso cursu viae.

3. Qui Iudaeis suscitavit

Rude testamentum,
Sese nobis instauravit

Novum testamenutm,
Venit, ut non ultra staret

Vetus sacramentum,
Et ut legis azymaret

Veteris fermentum.

4. Benedictus sermo patris,

Qui sic nos revisit,
Per quem sacer thorus matris

Mendam non admisit,
Quem a sinu patris [nata]

Caro non divisit,
Dum se carne calciata

Deitas immisit.

5. Virgo prudens et virilis

Nescia mixturae,
Dum parturit sub virilis

Forma creaturae,
Virgo, cella trinitatis,

Obvia naturae,
Salvo iure castitatis

Purum parit pure.