68. Salutatio Corporis Christi.

1. Ave, sub panis specie
Te relinquens ecclesiae,
Hoc mirandum sacramentum
Tuum fuit testamentum.

2. Panis formam intuemur,
Sed sub formis confitemur
Carnem iunctam deitati,
Deitatem parvitati.

3. Panis transit substantia,
Sed manent accidentia ;
O miranda potentia!.
Sed non minor est gratia.

4. Quod ille, qui sic potuit,

Ita fieri voluit,
Hinc fides et dilectio
Crescit atque devotio.

5. Nam dum de te nos satias,
Corde tibi nos socias,
Sanguis tuus vere potus,
Caro tua vere cibus.

6. Hoc fidelis ac devotus
Percipit, infidelibus
Calicis huius potio
Non salus, sed damnatio,

7. Bonis culpae purgatio,
Animarum refectio.
O creatoris dignitas !
Quanta, qualis humilitas!

8. Qui tuis sanctis manibus
Discipulis cenantibus
Prostratus pedes abluis,
Tu qui superbos respuis,

9. Formam praetendens humilem,
Ad te placandum utilem,
Te tradit Iudas osculo
Et pro vili munusculo.