65. In Assumptione BMV.

1 a. Ave, virgo virginum,
Ave. salus hominum,
Ancilla, quae Dominum
Genuisti, virgo, gaude.

1b. Ave, meum gaudium,
Amor et solacium,
Sis mihi principium
Et finis in tua laude,

2 a. Ut in tuum libitum
Sit cor meum deditum,
Lingua, mens et habitus;
Et tu, plena gratiae,

2 b. Sis mihi propitia,
Virgo, viri nescia,

Templum sancti spiritus,
Thronus regis gloriae.

3 a. Gaudia, quibus plus gaudes,
Honores, virtutes, laudes,
Dicam Deo adnuente
Lingua, voce, corde, mente,

3 b. Primum gaudium de caelis
Venit ore Gabrielis
Voce dicentis amoena:
"Ave, tu gratia plena".

4a. Secunda laetitia
Fuit ortus nuntia

Angelis cantantibus:
"In excelsis gloria .
Testibus pastoribus
Norunt animalia
Domini praesaepia.

4 b. Post secundam tertia
Fuit stella regia,

Magos cum muneribus
Reges regens praevia,

Deo flexis genibus
Trina dantes praemia
Fidem designantia.

5 a. Et laetitiae quartae
Maria, soror Marthae,
Fuit fidelis testis,

5 b. Cui angelus dixit:

"Quem quaeritis, revixit,
Ecce, locus et vestis'.

6 a. Quintum fuit gaudium,
Quando mater filium

Vidit caelos ascendentem ;
Remansit solacium
Cunctis et consilium.

6 b. Sextum sancti spiritus
Dans eis divinitus

Novas linguas, novam mentem
Scire cunctis penitus,
Nullus in hoc veritus.

7 a. Hoc septimum gaudium
non est par alterius,
Quando Dei genetrix
assumpta superius

Audivit choros et sonos
Super angelorum thronos
Videns suum filium,
Salvatorem omnium.

7 b. Haec quicumque gaudia
puro corde dixerit,
Nihil ei nocuum
quid nocere poterit,

Quia, qui matrem honorat,

Quae semper pro nobis orat,

Deus reddet meritum

Hic et in perpetuum.

8 a. Christe, qui nos redemisti,
Quando matrem assumpsisti,
O Deus une et trine,
Nostri sis memor in fine.

8 b. O Maria, mater Christi,
Tu, quae Christum genuisti,
Nostri sis memor in fine,
Ut vivamus sine fine.