DUBIUM.

1. Sed videtur,quod hoc non sit arguendum, scilicet quod aliquis philosophia utatur in assertionem fidei : quia Exodi, XII, 35, dicit Glossa, quod in auro et argento et vestibus aegyptiorum, quae Deus praecepit filiis Israel ut peterent ab aegyptiis, significantur aegyptiorum doctrinae, scilicet saeculares scientiae, quae ex ipsa consuetudine Gentium utiliter quaeruntur : et ideo non videtur esse inconveniens si quis philosopia utatur ad assertionem fidei.

2. Praeterea, Dan. I, 4, super illud, Ut doceret eos litteras, etc. dicit Glossa, " Liberales scilicet artes : " sed illi parvi proposuerunt, sicut ibi dicitur, ne contaminarentur: ergo dicendo liberales artes non contaminabantur : et sic licitum est eis uti et discere et docere.

3. Praeterea, Augustinus in libro de Civitate Dei, in primis decem libris disputat contra paganos de scriptis eorum : similiter facit hic Dionysius contra Apollophanem, et omnes alii sancti utuntur philosophia et rhetorica ad affirmationem fidei : ergo videtur quod hoc licite possit fieri, et debeat.

Sed dicendum, quod in asserenda fidei veritate non sunt introducendae rationes philosophicae : sed probatur tamquam ex priori ex inspiratione Spiritus sancti, tamquam vero ex posteriori ex miraculis, quae divinam ostendunt potentiam et philosophiae veritatem, sicut dicit Petrus in Itinerario Clementis : et ideo ad Heb. ii, 4, dicit Paulus Apostolus : Contestante Deo signis et portentis..., et Spiritus sancti distributionibus : sed sicut secundariae induci possunt, et sunt maxime utiles contra Philosophos, qui propter hoc quod sunt nutriti in verbis perscrutatis, versum est eis quasi in naturam, quod non possunt recipere sine sermone perscrutato : et ideo sancti utuntur contra eos ad assertionem fidei rationibus propriis ipsorum, nec hoc est inconveniens, et concedimus rationes ad hoc. Et per hoc patet etiam ratio omnium quae contra objici possunt : quamvis quidam qui nesciunt, omnibus modis volunt impugnare usum philosophiae, et maxime in praedicatoribus, ubi nullus eis resistit, tamquam bruta animalia blasphemantes in iis quae ignorant.