66. "De Assumptione gloriosae Virginis Mariae."

1 a. O Maria, sol splendoris,
Splendens intus, nitens foris
Ad decus ecclesiae.

1b. Te rogamus nostro more,
Ut illustres nos splendore
Tuae dulcis gratiae.

2 a. Tu flammantis sol ardoris
Fundens scintillas amoris
In caelis mirifice.

2 b. Coronaris sublimata,
Cumulata, debriata
Vini meri calice.

3 a. Tu es luna noctis huius
Pulchra, crescens, plena, cuius
Lux eclipsis nescia,

3 b. Quae clarescens vero sole
Cuncta facis resplendere
Caeli luminaria.

4 a. Tu caeleste firmamentum,
Quod stellarum ornamentum
Reddit gloriosius ;

4 b. Quo purgatur et firmatur
Et ad summa dilatatur
Nostrae mentis radius.

5 a. Tu es scala cupressina,
Sursum levans ad divina
Tuis iustos gradibus,

5 b. Ad te trabens peccatores
Per te factos ascensores
Et non suis viribus.

6 a. Tu supernae porta lucis,
Nos ad mensam introducis
Regis in caelestibus;

6b. Sancta clavis secretorum,
Cellam pandens unguentorum
Tuis amatoribus.

7 a. Miserere, virgo, tuis,

Quibus verum manna pluis
In deserto saeculi,

7 b. Ut terram promissionis
Saginati eius bonis
Nostri cernant oculi.