(65. (50.) De Poenis Inferni.

1. O quam dira, quam horrenda
voce iudex intonat,

Cum paratis mergi flammis
maledictos imperat,

Mox deglutiens viventes
Stygis olla devorat.

2. Vaporantur infelices
intus et extrinsecus,

Crepitantes strident flammae
velut ardens clibanus,

Ore, naribus et ipsis
profluunt luminibus.

3. Immortalis mors occidit
nec omnino perimit,
Ignis urit nec consumit
nec defectum recipit,
Vita moritur, mors vivit,
finis semper incipit.

4. Rediviva septem plagae
renovant supplicia,

Fumus, foetor, algor, ardor,
fames, sitis ignea,

Vermes nunquam satiantur,
qui corrodunt viscera.

5. Illic dolor, cruciatus,

fletus, stridor dentium,

Assunt fremitus leonum,
sibili serpentium,

Quibus mixti confunduntur
ululatus flentium.

6. Molis trabeae dracones
laxa pandunt guttura,

Quorum oculi sagittas
iaculantur igneas,

Caudae chelas scorpionum,
plantae produnt viperas.

7. Tendunt quidem ad non esse,
sed non esse desinunt,

Vivunt morti, volunt mori,
sed omnino nequeunt,

Qui male vixere, vitam
pro tormento perferunt.

8. Haec prae oculis, vesani,
formidantes ponite,

Haec subtili pertractantes
studio revolvite

Et pravorum vinclis morum
colla mentis solvite.

9. Nam paratus est conversis
indulgere veniam,

Qui perversis adhuc celat
vindictae sententiam ;

Salus, honor pio regi
per aeterna saecula.