65. De Beata Maria V.

1. O Maria,

O felix puerpera,

Mater pia,

Cuius suxit ubera,

Qui creavit sidera,

Munera

De te fluunt dulcia,

Spiritus sancti cratera.

2. Aqua viva,

Clausa semper ianua,

Progressiva,

Stella non occidua,

Ficus sed non fatua,

Irrigua

Paradisi pascua,

Balsamus, myrtus, oliva.

3. Ioseph spica,

Humus, de quo vipera,

Per quam sicca

lonae perit hedera,

Sanans anguis vulnera

Pertica,

Funda tu Davitica,

Parens cedrum mirica.

4. Salomonis

Thronus es eburneus,

Visionis

Electrinus urceus,

David sitim satians

Puteus,

Tu septenus cereus

Radians septenis donis.

5. Iacob scala,

Fac me caelum scandere,
Mundi mala,
Carnem, Satan fugere,
Tollens Evae miserae
Scandala,
Pietatis ubere
Gratiae fove sub ala.