QUAESTIO III ET IV LATERALIS.

Utrum Theologia in se sit scientia, et utrum sit scientia suballernans vel subalternata.

Alensis 1. part. quaest. 1. in. 1. Divus Thomas prima Summae, quaest. 1. art. 2. Richardus primo Sent. q. 2. Prologi. Durandus primo Sentent. quaest. 7. Prologi. Franciscus de Mayron. q. 14. Prologi. Aureol. in Prol. pag. 53. Scot. 1. Physic. quaest. 1. ad. 1.

Juxta hoc quaero : (a) Utrum Theologia in se sit scientia, et utrum ad aliquam scientiam habeat habitudinem aliquam subalternantis vel subalternatae ? Ad primum dico, quod quatuor includit scientia stricte sumpta, scilicet quod sit cognitio certa, hoc est absque deceptione et dubitatione, de cognito necessario, causata a causa evidente intellectui, applicata ad cognitum per discursum syllogisticum. Haec apparent ex definitione scire, primo Posteriorum. Ultimum, scilicet causatio scientiae per discursum a causa ad scitum, includit imperfectionem ex parte scientiae, scilicet quod sit effectus aequivocus, et etiam potentialitatem ex parte intellectus recipientis: ergo Theologia in se non est scientia, quantum ad ultimam conditionem scientiae, sed quantum ad alias tres conditiones est scientia in se et in intellectu divino.