72. De Corpore Christi.

1. Nunc amoris indicia
Christi pangamus inclita,
Quo sic se ipsum tradidit
In cibum pro famelicis.

2. Tua, Iesu, praeconia
Et inaudita munera
Affectu semper debito
Da promere cum iubilo.

3. Quae te vicit tunc caritas,
Te ipsum cum tradideras
In mortem et in pascua,
Quibus nulla sunt merita?

4. Tu patri sacrificium
Amoris per incendium
Oblatus saluberrime
Ara crucis acerrimae.

5. Hac hostia mundissima
Mundi cuncta peccamina
Tulisti per opprobria,
Per mortem, per supplicia.

6. Caritatis dulcedine
Tuo nos lavas sanguine,
Patri nos pacas dulciter,
Prorsus ineffabiliter.

7. Te per cruorem roseum,
Nostrae salutis pretium,
Precor, ut mente debita
Tua tractem mysteria.

8. Per tuam, Iesu, gratiam
Fac me per fidem debitam
Affectu ardentissimo
Huic me dare mysterio.

9. Da cogitare placita
Et facere gratissima,
Ut mundus corde, corpore
Te sumam, o dulcissime.

10. Tanti fructu mysterii
Virtuteque paracliti
Custodis et angelici
Dona munimen animae.