Sermo II

Item, sermo fratris Bonaventuras editus in Vigilia Nativitatis Domini coram rege Franciae et consiliariis et familia tota, in palatio regali Parisius.

Nascetur vobis parvulus et vocabitur Deus, fortis, Isaiae nono.

Qui vellet aliquid digne dicere vel audire de illo pulcherrimo, gratiosissimo et fragrantissimo flore , et de illa nobilissima, florentissima et vernantissima virga de radice Iesse, oportet, eum degustare aliquid de illo summe harmonico, summe odorifero et summe delectabili, et hoc per viam abundantissima devotionis, per quam anima fit sicut virgula fumi ex aromatibus myrrhae et thuris et universi pulveris pigmentarii.

Per viam excellentissimae admirationis, per quam anima fit sicut aurea luna et sol secundum processum illuminationum suspendentium animam ad admirandum Sponsum desideratum.

Per viam superabundantis exsultationis, per quam anima fit suavissimae dilectionis deliciis affluens, innixa super dilectum suum . Quoniam vero ista tria sunt difficilia mihi, immo quod penitus ignoro; ideo rogabimus ipsum pulcherrimum florem de Nazareth, ut interventione Matris suae, Virginis electae de radice Iesse etc.

Nascetur vobis parvulus etc. Secundum (Hebraicam veritatem sacer et sanctus Isaias duo in his verbis intendit, scilicet Filii Dei in carnem venturi mirandam humilitatem et ipsius in carne nati praecelsam sublimitatem. Primum, ibi: Nascetur vobis parvulus; secundum, ibi: et vocabitur Deus, fortis.

Nota ergo, quod natus est Filius Dei mundo et in mundo multiformiter utilis, quia sicut vere campus florum universalium ad replendum mundum puritate florigera; quarti Esdrae nono : Profectus sum in campum florum et sedi ibi in floribus.

Hortus liliorum pulcriformium ad replendum mundum castitate caelica; Canticorum sexto : Dilectus meus descendit in hortum suum, ut pascatur in hortis et lilia colligat.

Paradisus deliciarum omnium ad replendum mundum amoenitate sancta; Genesis secundo: Produxit Dominus Deus de humo omne lignum pulcrum visu et ad vescendum suave, lignum etiam vitae in medio paradisi.

Viridarium pomorum caelestium ad replendum mundum satietate interna; Canticorum quarto : Emissiones tuae paradisus malorum punicorum cum pomorum fructibus.

Pratum aro matum aeternorum ad replendum mundum suavitate aeterna; Canticorum sexto: Dilectus meus descendit in hortum suum ad areolam aromatum.

Fons benedictionum singularium ad replendum mundum sanctitate perfecta; Genesis secundo: Fons ascendebat e terra, irrigans universam superficiem terrae.

Fluvius plenitudinis gratiarum ad replendum mundum felicitate consummata; Genesis secundo: Fluvius egrediebatur de loco voluptatis ad irrigandum paradisum.