DIVISIO ET EXPOSITIO TEXTUS.

Deinde dicit quomodo ex scientia astrorum in qua peritus erat, poterat Apollophanes sursum agi in Deum : et primo in generali, secundo specificat in tribus exemplis, ibi, Quomodo igitur non veneratur, etc.

Dicitur ergo primo, quia non est quod ipse immoretur ad reprehendendum aliorum opinionem, quam ipsius Apollophanis. Propter hoc quod videtur, id est, propter id quod manifeste verum est, oporteret quod Apollophanes sciret, sicut sapiens in astris, quod ordo caeli (quantum ad hoc quod ordo unius est sub alio) et motus orbium non potest perverti nisi per operationem causae quae continet coelum in se, et causat ipsum per creationem quae facit omnia et mutat solo verbo

suo sancto : et ita cum aliquando transmutatus fuerit ordo et motus caelestium, non est dubium, quod ille qui transmutavit, Deus est, et ipsum venerari et colere debemus.