Sermo V.

Item, sermo fratris Bonaventurae editus Lugduni in Capitulo coram Fratribus de mane, in Vigilia Nativitatis.

Terra nostra dabit fructum suum, Psalmus .

Terra nostra Virgo Maria est, fructus suus Christus natus est, dare ipsius parere est.

Fuit antem beata Maria terra divina manu culta et a malis radicibus expurgata per exterminium fomitis et concupiscentiae; Exodi tertio: Locus, in quo stas, terra sancta est, fuit dictum Moysi, quando vidit rubum.

Soli opposita, cum calore vivifico incaluit per incendium Spiritus sancti amoris et benevolentiae ; Ecclesiastici quadragesimo tertio : In meridiano exurit terram, et in conspectu ardoris eius quis poterit sustinere?

Compluta, humectata et irrorata per influxum sempiterni interius gaudii et laetitiae; Psalmus: Visitasti terram et inebriasti eam, multiplicasti locupletare eam.

Debito et digno semine sata per illapsum divinae Sapientiae sive Filii Dei personae; Genesis vigesimo sexto: Sevit Isaac in terra illa et invenit in ipso anno centuplum.

Dedit autem beata Maria sive protulit nobis fructum florigerum in ortu suae nativitatis propter medicinam omnimodam; Proverbiorum tertio : Primi et purissimi fructus eius.

Gratiosum in aspectu suae conversationis propter innocentiam perfectam; Ecclesiastici vigesimo quarto: Ego quasi vilis fructificavi suavitatem odoris, et flores mei fructus honoris et honestatis.

Pretiosum in gustu suae praedicationis propter gratiam veram; Canticorum secundo: Sub umbra illius quem desideraveram, sedi, et fructus eius dulcis gutturi meo.

Opulentum in actu suae passionis propter efficaciam aeternam; Canticorum septimo: Dixi ; ascendam in palmam et apprehendam fructus eius.