73. De Gaudiis BMV.

1. Gaude, mater, semper gaude,
Vere summa digna laude,
Gaude, mater luminis ;
Eja, nimis speciosa,
Potens et imperiosa,
Larga fonte numinis.

2. Gaude, Deum virgo paris
Et per rubum designans

Non passum incendia,
Verbi pignus incarnati
Tuae datur caritati

In pacis stipendia.

3. Gaude, mater novi regis,
Per te dantur novae legis

Certa privilegia,
Imperatrix concordiae,
Mater misericordiae,

Flos de stirpe regia.

4. Gaude, tu praedestinata,
Ab aeterno dedicata,
Triclinium Domini,
Astra, solum, maria
Laudem promunt, o Maria
Tuo sancto nomini.

5. Gaude, libri prophetarum,
Figurae patriarcharum

Te diu praedicaverant,
Mater gratiae coelestis,
Medelam morbi scelestis
Te desideraverant.

6. Gaude, gaudium sanctorum,
Thesaurus apostolorum,

Martyrum victoria,
Confessorum laudis thema
Virginumque diadema,

Angelorum gloria.

7. Gaude, florens virgo Jesse,
Ecce Deus fecit esse

Florem et amygdalum,
Vas insigne plenum melle,
Omne malum procul pelle,

Aufer omne scandalum.

8. Gaude, regni vitae clavis,
Quam praeclara, quam suavis

Lucerna justitiae,
Vitae spes, dulcedo, salus,
Qua fugatur draco malus,

Organum laetitiae.

9. Gaude, quam mundus adorat,
Sanctorum chorus honorat,

Laudat universitas,
Omnibus nam profuisti,
Solatium contulisti,

Spe cadit adversitas.

10. Gaudet coelum, quod te videt,
Serenius totum ridet

De tua praesentia,
Omnis terra jucundatur,
Daemon tremit, mors fugatur

De tua potentia.

11. Gaude, rosa sine spina,
Peccatorum medicina

Lapsis dans remedium,
Eja, digna mediatrix
Et benigna consolatrix,

Pacis ferens medium.

12. Gaude, virgo mater Christi,
Gaudium quae genuisti,

Patris unigenitum,
In quo semper jucundaris
Et prae cunctis gratularis

Felix in perpetuum.