73. De [XIV] Gaudiis BMV.

1 a. Gaude, virgo, mater Christi,
Quae per aurem concepisti
Gabriele nuntio.

1b. Gaude, quia credidisti,
Ut a cognata audisti
Miro vaticinio.

2 a. Gaude, quia Deo plena
Peperisti sine poena
Cum pudoris lilio.

2 b. Gaude, cum gens aliena,
Facta supplex et amoena,
Munera dat filio.

3 a. Gaude, praesentans filium
Ad cunctorum subsidium
Simeoni anxio.

3 b. Gaude, quod post exsilium
Fit hostium excidium
Et repatriatio.

4 a. Gaude, postquam amisisti
Iesum, quem post repperisti
In templi gymnasio.

4b. Gaude, quod interfuisti
Miraculis, quae vidisti
Procul omni dubio.

5 a. Gaude, quia tui nati,

Quem dolebas mortem pati,
Fulget resurrectio.

5 b. Gaude, causa spoliati
Carceris et hostis strati
Forti hastiludio.

6 a. Gaude Christo ascendente,
Qui in caelum te vidente
Motu fertur proprio.

6 b. Gaude flamma descendente

Te et tuos accendente

Amoris incendio.

7 a. Gaude, quod post Iesum scandis,
Et est honor tibi grandis
In caeli palatio ;

7 b, Ubi pectus nato pandis
Pro gratiis impetrandis
Pauperum collegio.

8 a. Gaude, mater constitui
Praesidens tanto coetui
Angelorum consortio;

8 b. Ubi fructu ventris tui
Per te detur nobis frui
In perenni gaudio.