76. De

Annuntiatione B.M.V.

1. Fortis ut mors dilectio.

Qua durum fit suave ;
Ut sancta refert lectio,

Nil est amanti grave.

Amor nos traxit a vae,
Dum de caelesti solio
Fit Gabrielis missio

In virgnis conclave.

O felix, inquit, ave,
In te fiet conceptio,
Sed non pudoris laesio,

Tu tantum Deo fave.

2. Auditis his obstupuit
Puella Deo grata
Et, ut pudicam decuit.
Silebat salutata ;
Ne fieret turbata,
Mox angelus retexuit.
Modum partus exposuit,
Quod foret illibata.
Qua serie prolata
Ara caelestis claruit,
Dum virgo verbo paruit
Et mansit impraegnata.

3. Archangelus regreditur,

Qui venit haec narrare,
Et gravida relinquitur

Puella sine pare.

O decus singulare!
Virgo mater efficitur,
Creator est, qui gignitur

Et Dei salutare.

O pectus puellare,
Thesaurus in te tegitur,
Virtute cuius regitur

Caelum, tellus et mare.

4. Magna sunt haec miracula,
Quae manant ex amore ;
Amoris ardet facula
Nec uritur ardore.
De Gabrielis ore
Dum virgo sumit verbula,
Frondescit Aaron virgula
Omni carens humore,
Et vellus madet rore,
Nec terram tangit stillula,
Cum virgo sine macula
Meretur mater fore.

5. Mira matris integritas
In ventre Deum vexit,
Ut solio divinitas

Portantem se protexit,
Pro nobis se despexit
Vera Dei sublimitas,
Dum infirmatur sanitas,
Quae mori non neglexit;
Sed, quando resurrexit,
Vera patebat deitas,
Et sic probatur caritas,
Qua Deus nos dilexit.

6. O domina dulcissima,
Vultu nitens decoro,
O mater clementissima,
Virili carens thoro,
Te postulans exoro,
Ut, quae feci, nequissima
Pellantur et turpissima,
Ne daemon trahat loro ;
Condonans, quod ignoro,
Ad gaudia clarissima
Nos transfer, beatissima,
Ducensque caeli choro.

7. O mater humilitatis,

In qua Deus incarnatur,

Pulchra et admirabilis,
Cui nulla comparatur,

Gaude, nam tuis brachiis
Divina virtus portatur

Foveturque obsequiis

Atque mamilla lactatur,
Tuis favet imperiis

Nec non precibus placatur;
Impetra, nobis miseris,

Ut mox ad te dirigatur
Spiritus et his gaudiis

In sempiternum fruatur,
Et populus incredulus

Ad Iesum per te convertatur.