74. De Gaudiis BMV
In Nativitate BMV.

1. Tua, virgo, nativitas
Est miseris felicitas,
Peccatoribus sanitas
Et angelis festivitas.

2. Maria, coelo serenior,
Et sole es splendidior,
Nec non et luna pulchrior
Cunctisque astris clarior.

3. Angelis amabilior,
Adspectu es venustior,
Gratia elegantior,
Cunctis creatis dulcior.

4. Ergo, virgo, egregia,
Nata de stirpe regia,
Per te donetur venia
Supplicibus et gratia.

5. Melleum jam coeli rorem
Pluunt, ros infundit florem,
Flos mel stillat, mel odorem
Vitae spargit et saporem.

6. Ave, per hoc eulogium,
Concipis Dei filium,
Virginitatis lilium
Habens et matris gaudium.

7. O cella pigmentaria,
Vas plenum sapientia,
Virtutibus et gratia,
Nos gustu vitae satia.

8. Ave, felix hospitium,
Nullius sordis conscium,
Thalamus et palatium
Thronusque regis omnium.

9. Per illud, mater, gaudium,
Quod sensisti, dum filium
Gestabas, sis humilium
Spes salus et solatium.