Sermo VII .

Item, sermo fratris Bonaventurae editas in Vigilia Nativitatis Domini coram Conventu Monachorum sancti Dionysii, de mane.

Veritas de terra orta est, Psalmus .

Dominus Iesus, qui dignatus est nasci et apparere inter homines sicut gemma et pretiosissima margarita, de qua Matthaei decimo tertio , ad universalem candorem animarum, ad universalem fulgorem intelligentiarum, ad universalem confortationem debilium, ad universalem recreationem et exhilarationem fidelium, ipse sua bonitate aeterna, sua pietate, sua liberalitate det mihi etc.

Veritas de terra orta est. Ecce, impleta est prophetia Isaiae orantis et praedicantis, quod de terra geminaretur Salvator, et de caelo roraretur iustus aliorum iustificator, quia veritas de terra orta est. Ortus est autem de Virgine Matre tanquam de terra de caelo fecundata et benedicta ipse Dei Filius sicut fons in horto ad abluendum quadruplicem immunditiam nostram, scilicet sensuum, consensuum , affectuum et cogitationum; Canticorum quarto: Fons hortorum, puteus aquarum viventium, quae fluunt impetu de Libano.

Sicut flos in campis ad fragrandum per septiformem gratiam; Isaiae undecimo : Egredietur virga de radice Jesse, et flos de radice eius ascendet, et requiescet super eum spiritus Domini: spiritus sapientiae et intellectus, spiritus consilii et fortitudinis, spiritus scientiae et pietatis, et replebit eum spiritus timoris Domini.

Sicut fructus in agro ad reficiendum per multiformem efficaciam; Apocalypsis ultimo: Lignum vitae afferens fructus duodecim, per menses singulos reddens fructum suum et folia ligni ad sanitatem gentium.

Sicut sol in caelo ad influendum universalem sapientiam vel prudentiam: Malachiae ultimo: Orietur vobis timentibus nomen meum sol iustitiae; Isaiae trigesimo octavo: Regressus est sol decem lineis per gradus, quos descenderat.