Sermo VIII .

Item, sermo fratris Bonaventurae editus coram canonicis Parisius in ecclesia maiori.

Egredimini et videte, filiae Sion, regem Salomonem in diademate, quo coronavit illum mater sua in die desponsationis illius et in die laetitiae cordis eius, Canticorum tertio .

Sapiens, Spiritu sancto praeventus, hortatur his verbis omnem animam ad Nativitatem Christi devotissime celebrandam et diligentissime ruminandam et speculandam. Proponit autem de ista sacra solemnitate primo, quomodo debeat celebrari, quia devote et pure et sincere, cum dicit: Egredimini. Iste autem egressus non est nisi quaedam praeparatio digna devotae mentis.

Secundo, a quibus debeat celebrari , quia a clericis, Religiosis et veris Christianis, cum dicit: filiae Sion, quae intelligitur specula vel speculatio.

Tertio, de quo debeat celebrari, quia de Filio Regis aeterni, cum dicit: et videte regem Salomonem, pacificum et amabilem, Christum.

Quarto, pro qua re debeat celebrari, quia pro Nativitate Salvatoris, cum dicit: in diademate, quo coronavit illum mater sua, per carnem, in die desponsationis illius etc, unionis divinae naturae et humanae, unionis cum Ecclesia, et in die laetitiae cordis eius, id est utilitatis assumtionis et unionis illius et gaudii ex hoc sempiterni beatae Mariae et universalis in hoc desponsatae Ecclesiae.

I. Circa primum nota, quod si volumus celebrare devote et pure et sincere Christi Nativitatem, debemus egredi de captivitate peccatorum ad libertatem virtutum gratiae et desertionem mundialium; Genesis duodecimo : Egredere de terra tua et de cognatione tua et de domo patris tui etc.

De opacitate intellectuum ad claritatem luminum sapientiae per meditationem caelestium; Genesis vigesimo quarto: Egressus fuerat ad meditandum in agro etc.

De tempestate occupationum exteriorum ad iucunditatem aeternorum per tranquillitatem interiorum; Canticorum septimo: Egrediamur in agrum, commoremur in villi s, mane surgamus ad vineas, videamus, si floruit vinea. .

II. Circa secundum nota, quod clerici et Religiosi et veri fideles, digne volentes Christi Nativitatem colere, debent esse filiae Sion per decorem integritatis sensuum; Canticorum secundo : Sicut litium inter spinas, sic amica mea inter filias.

Per gratiositatem promptitudinis mysteriorum; Psalmus: Audi , filia, et vide et inclina aurem tuam.

Per ornatum multiformitatis virtutum; Psalmus :

Omnis gloria eius filiae regis ab intus in fimbriis aureis, circumamicta varietatibus.

III. Circa tertium note, quod Christus natus habuit plus quam Salomon pulcritudinem omnis sapientiae, gratiae et affluentiae. Ideo debemus videre et considerare in eo sicut in vero Salomone, cuius ille figura fuit, plenitudinem superexcellentis potentiae et ei humiliari et eum venerari; Apocalypsis decimo nono : Habet in vestimento et in femore suo scriptum: Rex regum et Dominus dominantium.

Supersplendentis sapientiae, et eum contemplari, speculari et meditari; Ieremiae vigesimo tertio: Regnabit rex et sapiens erit et faciei iudicium et iustitiam in terra.

Superaffluentis pacis et concordiae, et eum desiderare, degustare et amare; Psalmus: Deus , iudicium tuum regi da. Orietur in diebus eius iustitia et abundantia pacis.