75. De Gaudiis BMV.
"Sequentia, quae erit tractus in LXX."

1 a. Gaude, virgo, mater Christi,
Quae per aurem concepisti
Gabriele nuntio.

1b. Gaude, quae a Deo plena
Peperisti sine poena
Cum pudoris lilio.

2 a. Gaude, quod tres dona ferunt
Nato, quem adoraverunt
In felici gremio.

2 b. Gaude, virgo, praesentatus
Per te quod est tuus natus
Legis testimonio.

3 a. Gaude, quia tui Dati,

Qu em videbas mortem pati,
Fulget resurrectio.

3 b. Gaude, mater, ascendente
Christo caelo, te vidente
Motu fertur proprio.

4 a. Gaude, quaepostipsum scandis,
Et est honor tibi grandis
In caeli palatio.

4 b. Gaude, angelis praelata,
Trinitati proximata
Singulari gratia.

5 a. Gaude, virgo, laus cunctorum,

Super decus angelorum

Fulget tua gloria.

5 b. Gaude, dies ut ornatur
Sole, ita iucundatur
In te caeli curia.

6 a. Gaude, tuae voluntati
Affectus est trinitati
Favere ad omnia.

6b. Gaude, te honorant caeli
Cives affectu fideli
Et oboedientia.

7 a. Gaude, tibi obsequentes
Terrae et caeli gaudentes
Sumunt per te praemia.

7 b. Gaude, honor tuus crescit
Semper atque finem nescit,
Nec hic nec in patria.

8 a. Ergo, cara mater Dei,
Duc nos reformatos ei
Ad festa caelestia,

8b. Ubi fructus ventris tui
Per te nobis detur frui
In aeterna gaudia.