78. De Partu Virginis.

1. De crystallo scintillula,
De rubo micat flammula
Et clausa botri clausula
Flos florum immarcescens,
Plus flore flos flagrescens,
De Iesse prodit virgula.

2. Cum sine paris copula
Patrem parit puellula,
Nec frangitur ampullula
Virginei pudoris,
Naturam nati floris
Admirantur miracula.

3. De sigillo puerperae
Mirantur matres ceterae;
Patet, cur sicco vellere
Sit area rorata,
Cum virgo fecundata
Sit sine carnis opere.

4. Virginitatis speculum
Spe penetrat ad oculum
Et salvum manet vasculum.

Quid, zabule, miraris?

Secreti puellaris
Signatum est signaculum.

5. Mater, virgo sunt paria,
Quae fuerant contraria,
Nec iam hac consequentia
Potest argumentari,
Nam in hoc singulari
Naturam vincit gratia.

6. Remoto velo literae
Moysi lac ab ubere
Sponsa suxit in vespere,
Dum virgo salutatur,
Et nobis distillatur
Eos caelestis ab aetbere.