76. De Nomine BMV.

1 a. Sanctae Mariae,
Matris Dei piae,
Nomen omni die
Laudare volo.

1b. Tam dulce nomen
Praeter Dei nomen
Vel eius agnomen
Nullum recolo.

2 a. Nomen dulcoris
Gratique decoris,
Nomen, quo cantoris
Cor reficitur.

2 b. Matri divinae
Caelique reginae,
Mundi medicinae
Canam igitur.

3 a. Ave, gloriosa,
Gemma pretiosa,
Rosa speciosa,

Lilium convallium.

3 b. Flos virginitatis,
Forma paupertatis,
Dux humilitatis,
Tristium solacium.

4 a. Luna pulchrior,
Sole lucidior,
Stella nitidior,
Expers paris ;

4b. Melle dulcior.
Nardo suavior,
Caelo capacior
Comprobaris.

5 a. Scala, quam per somnium
Iacob contemplatur,
Rubus, qui incendium

Non patiebatur,

Sidus, quod exidium

Moab cominatur.

5 b. Arca, qua lex ponitur
Evangeliorum,
Urna, qua reconditur

Manna beatorum,
Velum, quod appenditur
In sancta sanctorum.

6 a. Virga sicca floruit
Atque fronduit
Et protulit
Fructum ;

6 b. Et, quem virgo genuit,
Mortem diruit
Et abstulit
Luctum.

7 a. Terra fructifera,
Nardus odorifera,
Vitae vexillifera,
Laus tropaei;

7 b. Decor propheticus,
Honor apostolicus,
Iubilus angelicus,
Mater Dei.

8 a. Fons puritatis,
Mater honestatis,
Templum deitatis,
Solis camera,

8 b. Uber oliva,

Fontis aqua viva,
Carnis incentiva
Tu refrigera.

9 a. Da mundi divitias
Spernere,
Corporis delicias

Fugere,
Daemonum audacias
Terere,

Speculum victoriae;

9 b. Da virtutis ardua
Scandere,
Veritatis cernua

Cernere,
Da Dei melliflua
Carpere,

Diadema gloriae.

10 a. Sic, Maria,
Virgo pia,
Nos soletur
Et hortetur

Semper tua facies ;

10 b. Et assiste

Nobis, Christe,
Nec desistas,
Donec sistas,

Ubi te nos saties.