Sermo X.

Item, sermo fratris Bonaventurae in Vigilia Nativitatis editos apud sanctam Mariam de Portiuncula, coram Fratribus loci et mattis aliis.

Sanctificamini, cras comedetis carnes, Numerorum undecimo .

Sacer et sanctus Moyses radio lucis aeternae illuminatus, hortatur his verbis populum Dei primo ad Christi Nativitatis praeparationem condignam; secundo ipsius praeparationis condignae assignat causam sufficientissimam. Primum, ibi: Sanctificamini; secundum, ibi: cras comedetis carnes, id est, reficiemini spiritualiter Christi nativitate per carnem.

I. Nota primo, quod qui vult in die Nativitatis Christi refici spiritualiter per Christum natum debet sanctificari hodie per cultum puritatis interioris; primae ad Thessalonicenses quarto: Non enim vocavit nos Deus in immunditiam, sed in sanctificationem.

Per cultum religiositatis exterioris; Psalmus: Super ipsum autem efflorebit sanctificatio mea.

Per cultum devotionis caelestis; primi Regum decimo sexto: Sanctificamini et venite me cum, ut immolem.

Per cultum meditationis ipsius incarnationis; Iosue tertio: Sanctificamini, cras enim faciet Dominus inter vos mirabilia.

II. Sanctificari vero debemus merito hodie et praeparari, quia dies crastinus est dies desideratus cum vehementi flagrantia; Genesis trigesimo : respondebit mihi cras iustitia mea.

Suspiratus cum inexplicabili vehementia; primi Regum undecimo : Cras erit vobis salus, cum incaluerit sol.

Amatus propter utilitatis efficaciam; secundi Paralipomenon vigesimo: Cras egrediemini contra eos, et Dominus erit vobiscum.

Decoratus propter mysteriorum redundantiam; Exodi nono: Cras faciet Dominus verbum istud in terra.

Fecundatus propter benedictionum exuberantiam; quarti Regum septimo : ''In tempore hoc cras modius similae uno statere erit et duo modii hordei statere uno in porta Samariae.

Glorificatus propter gestorum evidentiam; Iosue tertio: Cras faciet Deus inter vos mirabilia.''