78. Hymnus de prudentia.

1. Quod potes bonum facere,
Operare tu instanter,
Non differas peragere,
Semper gere tu constanter,
Nam solet tempus fallere,
Gerit tristeque laetanter.

2. Iamque differre tollitur
Et id saepe commutatur,
Quis humilis extollitur
Et superbus impugnatur,
Quiescit hic, qui moritur,
Vivensque labori datur.

3. Non speret quis in homine,
Postquam de mundo obiit,
Vivens se purget onere,
Beatus vir, qui meminit,
Dum manet quis in robore,
Consideret, quod desinit.

4. Repertus ubi fueris,
Iudicaberis pro certo,
In peccato non moreris,
Tu recedes in momento,
Tui finis memor eris,
Recludens monumento.

5. Nescis diem neque horam,
Quando eris recessurus,
Tu damnosam cede moram,
Si peccato es mansurus,
Surge ante tu auroram,
Sis prudenter praevisurus.

6. Dum vivis, bene semina,
Ut possis recolligere,
Tu quaere lucis limina,
Ut videns possis pergere,
Vitabis mala flumina,
Si non vis certe ruere.

7. Non speres tu post obitum,
Ut heres tibi conferat,
Non meminit se monitum
Id exsequi, quod dixerat,
Iam nomen est abolitum
Testantis, qui mandaverat.