COMMENTARIUS.

(a) Circa quartam quaestionem Doctor quaerit duo. Primo : An Theologia sit scientia praclica? Secundo : A quo scientia dicatur practica ? Argumenta primae quaestionis satis clara sunt. Item secundae, tamen pro majore declaratione argumenta secundae adduco.

(b) Primo arguit, probando quod scientia practica non dicatur practica ab objecto, quia 3. de Anima, intellectus practicus fine differt a speculativo. Cum ergo quae sunt principia distinguendi, sint principia essendi, sequitur quod finis erit principium essendi practicum et non subjectum.

Secundo arguit, quia practica est minus nobilis quam speculativa, quia practica est gratia usus. Haec ratio non teneret, nisi usus esset per se finis illius habitus, quia scientia ab eo habet suam nobilitatem a quo habet suam denominationem ultimam.

Sed denominatur practica, quia gratia usus ; ergo gratia usus erit per se finis illius habitus et non objectum. Patet, quia non dicitur per se practica gratia objecti, ut patet per Philosophum.

Tertio arguit auctoritate Philosophi : Finis speculativae veritas, finis practicae opus; ergo dicitur practica ab opere sive a praxi ut a fine, ergo non ab objecto praxis.