79. De Beata Maria V.

1 a. Salve, virgo singularis,
Quae cum Deo gloriaris ;
Salve, clara stella maris,
Omni plena gratia.

lb. Salve, Iesse stirps beata,
Virgo, palmae coaequata,
Per quam nobis reserata
Caeli patet regia.

2 a. Virgo potens et regalis
Et puella specialis,
Mulierum nulla talis
In magnificentia.

2 b. Paritura lumen clarum,

Pignus dulce, pignus carum,
Quam dixere prophetarum
Vera vaticinia.

3 a. Quae dum credit Gabrieli,
Verbi nuntio fideli,
Parit ex se regem caeli,
Porta Deo pervia ;

3 b. Per quem mundus reparatur,
Reparatus adornatur,
Et mundanis restauratur
Libertatis gloria.

4 a. In bis autem declaratur,
Declarata figuratur
Virgo, quae non defloratur
Per viri consortia ;

4b. Rubus ardet, nec decrescit,
Virga sicca revirescit,
Vellus perfusum madescit
Deitatis pluvia.

5 a. Mater Dei, nos exaudi
Et benigna preces audi,
Quas depromens tuae laudi
Concinit ecclesia.

5 b. Mundi decus salutare,
Natum tuum deprecare,
Ut dignetur nos locare
Cum caeli militia.