80. De Beata Maria V.

la. Trinitati virgo grata,
Rore caeli fecundata,
Florem parit caelicum;

1b. Sic aegrotis [guttam diam]
Pater stillat in Mariam
Verbum per angelicum.

2 a. Haec est arca testamenti
Manna servans nutrimenti,
Quod descendit caelitus;

2 b. Petra, de qua sitienti
Dulcis aqua datur genti,
Quae scatet divinitus.

3 a. Inexpertae castitatis
Necnon et humilitatis
Sponso dat exenia:

3 b. His allectus fit dilectus,
Et adflictis pro delictis
Gulpae datur venia.

4 a. Paradisus aperitur,

Et proscriptus investitur
Uranicis muniis ;

4b. Contra sathan disputatur
Et aperte confutatur
Super suis naeniis.

5 a. Chirographum fit deletum,

Leti vice fit decretum

Iudicis sententia;

5 b. Exhinc vadit immolari,
Quae non novit novercari
Filiis, clementia.

6 a. Offert nostris pro peccatis
In odorem suavitatis
Corporis primitias,

6 b. Et scelestos angelorum
De profundo vitiorum
Ciet ad delicias.

7 a. Psallant ergo laudes grati
Sacrosanctae maiestati,
Quos praevenit gratia

7 b. Et a sathan servitute
Liberatos caeli tute
Locat in palatia.

8 a. Honor, decus sit et patri,
Qui de morte morte nati
Natos revivificat:

8b. Sit et Iesu symphonia,
Cuius victrix agonia
Enesis tripudiat.

9 a. Gaude, mater singularis,
Cui totus triumphalis
Titulus ascribitur,

9 b. Quia regem virgo paris,
Cui caeli, terrae, maris
Machina subicitur.

10 a. In extremae vitae pirgo
Miserere nostri, virgo,
Iungens nos caelestibus,

10 b. Ubi patris, ubi nati

Pneumatisque praesentati
Fruamur aspectibus.