78. (5.) Oratio ad sanctum Petrum Apostolum.

1. O princeps apostolorum,
regni Dei claviger,

Christianae veritatis
doctor atque legifer,

Divinae praeceptionis
operator impiger,

2. Petre, cuius supra petram
fundamentum stabile
Collocatum Armatumque

novimus ecclesiae
A summo, sed reprobato
angulari lapide,

3. Qui tui tanta doctoris

es elatus gloria,
Ut, quae ligas et quae solvis

potestate tradita,
Sit ligatum et solutum

supra caeli sidera,

4. De amore requisitus
certiori tertio
Trinam das confessionem

more promptus solito
Eo ipso, quem latere
nihil valet, conscio.

5. Oves ergo tibi dantur,

quas pascas, dominicae,

E quibus sum una lupi
lacerata vulnere,

Quam cures sanesque quaeso,
pastor clementissime.

6. Si te miser et peccator

offendi multoties,
A sacrato discis ore,

non tantum ut septies,
Sed ut septies remittas

culpas septuagies.

7. Exoret pro nobis [sacer]
chorus apostolicus,

Ut illius complacatus
interventu Dominus

Culpas remittendo veris
iungat paenitentibus.