85. De sancto Benedicto.

1. Aureo solis radio perenni
Hac die totus decoratur orbis,
Ut tuus felix, Benedicte, festis
Clarior adsit.
2. Bella mirandis opulenta factis,
Signa virtutum, speciale munus
Regulae praebent tibi sempiterno
Tempore laudes.
3. Clares aetatis teneris ab annis
Moribus, vitam quibus ordinasti,
Cum voluptati dederis nec ulli
Intima cordis.
4. Deditur tanto prius id triumpho,

Vas quidem fractum, muliebre damnum,
Quod puer sanum prece lacrimosa
Restituisti.

5. Exhibens sanctus celer institutum
Artium summis studiis relictis
Rebus et patris fugis et salebri
Veste bearis.

6. Foveras antro tua membra parvo
Mensibus versis novies quaternis,
Quo manens nullis hominum sed uni
Notus haberis.

7. Grata divino tibi festa nutu

Conferunt pastum, latitans videris,
Fama fit, vulnus perit omne mentis
Vulnere carnis.

8. Hinc cracis signum bullulans veneni
Poculum frangit, vaga mens fugatur,
Virgulae tactu fluit e cavato
Marmore lympha.

9. Insilit ferrum capulo reversum,
Mollis humanos regit unda passus,
Qua tuam raptus Placidus melotem
Cernere fertur,

10. Karus horrendam tulit ales escam,
Fles nimis sontis nece motus hostis,
E loco cedens solito petisti
Laris amoena.

11. Lubricus strata fuit anguis ara,
Aggravat pondus, strepit igne falso,
Sed nihil contra valet inchoatum
Ferre laborem.

12. Membra collapso lacerata muro
Sana redduntur, patulo probantur
Fratribus furtim male facta, regis
Panditur astus.

13. Noxa libantem necat et ruina
Sedis electae patet, obtinentur
Spiritus, rapto latitare vino
Cernitur hydrus.

14. Objicis fratri, quod inane fecit,
Inspicis mentem penitus rebellem,
Copiam prodis gravidisque somno
Consulis index.

15. Perfidos tellus procul egit artus,
Sistit errantem draco, cessit ulcus
Regium, nummi subiere, fugit
Horrida pestis.

16. Quod cadit, vitrum patet esse salvum,
Vasa producunt oleum, chelydrus
Pellitur dextra, manuumque loca
Visio solvit.
17. Reddito vitae puero subire
Caeclicas sedes animam sororis
Et velut solis radio sub uno
Omnia cernis.
18. Scandis ardenti sacer orbe praesul
In coelum via facibus corusca,
Quando ter ternis tribus ot Kalendis
Instat Aprilis.
19. Te canit laetus chorus angelorum
Patriarcharumque et apostolorum
Et prophetarum meritis ab omni
Parte beatum.
20. Ut sit hujus plebs memor ista laudis,
Hic ames dici, pater, hanc decenter
Si doces, laute refove polumque
Scandere praebe.
21. Xriste, devoti pretium laboris,
Confer istius prece nos juvari,
Cujus exemplo peritura foedi
Liquimus orbis.
22. Ymnus hic noster, Benedicte princeps,
Sit tibi semper placidus, tuorum
Qui salus es, lux, decus et perennis
Laus monachorum.

23. Zeta coelestis pretiosa regis

Te facit veris celebrem trophaeis,
Unde nos semper petimus frequentes
Nocte dieque.
24. Doxa sublimi maneat parenti
Ejus et sacro diadema nato
Et tibi virtus, utriusque compar
Spiritus alme.