83. Hymnus contra vitia et peccata.

1. Superbus ne tu maneas,
Vitabis tu superbiam,
Et alteri non noceas,
Ne ruas in infamiam,
Quod verum, ne tu taceas,
Repelles tu insaniam.

2. Quid elatus superbio?
Iam sum comparatus luto ;
Quid ad peccandum vigilo,
Iam sum comparatus bruto ;
Quid Domino non servio,
Qui me vult in loco tuto?

3. Nequam invide, quid doles,
Quid retines invidiam,
Si felix pater ac proles
Habens fortunam nimiam?
Tale vitium non coles,
Tu fugies accidiam.

4. Noli abs re tu irasci,
Sed recede tu ab ira,
Nam ex ea solet nasci
Malum dissonante lyra,
Potes malo cibo pasci,
Tu per eam raro gyra.

5. Parum dormi, non sis piger,
Tu refuge pigritiam,
Nisi cesses, eris miser,
Repelle tu desidiam,
Non es albus, sed tu niger,
Si sequeris tristitiam.

6. Non manebis tu avarus,
Et nec in malis cupidus,
Remanebis Deo carus
Et in virtute validus,
Eius actus est amarus
Et hic ad malum callidus.

7. Si quis ditari festinat,
Non manet ipse innocens,
Nec enim corde cogitat,
Quod erit ipse indigens;
Qui saepe iurat, deierat,
Hic est ad plagam veniens.