85. De sancto Spiritu.

1. Gaude, quam sanctus spiritus
In ventre matris primitus
Consecravit divinitus
Et sic replevit penitus.

2. Hinc devota humilitas,
Hinc tibi flagrans caritas,
Hinc fecunda virginitas,
Hinc virtutum fecunditas.

3. Nos purgatos a peccatis
Rore riga sanctitatis,
Gratia sancti pneumatis
Et ardore caritatis.

4. Memento, cur eligeris
Vel cur mater efficeris,
Quod vere si perpenderis,
Homini misereberis.

5. Ex te carnem assumere
Elegit, ut redimere
Posset nos et educere
Christus de mortis carcere.

6. Mater Dei hinc vocaris
Et regina appellaris,
Coelo, terrae dominaris
Et a cunctis veneraris.

7. Nobis pro tanto munere
Debes jure succurrere
Et contritos suscipere
Deoque restituere.

8. Te ergo flexis genibus
Oramus ac gemitibus,
Ut in supernis sedibus
Jungamur coeli civibus.

9. Ubi felici gaudio
Dei ac tuo filio
Fruamur et haec actio
Nostra sit laus et visio.