82. De s. Iohanne Baptista.

1. Cleri universitas,
Solve laudes debitas

Beato Iohanni,
Ut per eum siccitas
Cesset, et humiditas

Assit boni anni.

2. Gaude, cleri contio,
Laetare cum gaudio,
Iohannem implora,
Ut eius subsidio
Aestuum effusio

Cesset absque mora.

3. Iohannis nativitas
Per sortes exhibitas

Claruit praeclare,
Cui laudes debitas
Populi immensitas

Debet decantare.

4. Dum iuventa floruit,
Maculari respuit

Vaniloquo felle,
Hinc eremum coluit
Et pro pastu habuit
Locustas cum melle.

5. Vitam ducens asperam
Docuit ad literam

Atque baptizavit,
Vestem gerens bugeram
Nec vinum nec siceram
Nec mustum potavit.

6, Mundo nolens subici
Nominis angelici

Voce nominatur,
Carne spernens infici
Laurea centuplici

Caelo laureatur.

7. Lux, lucerna praevia,
Hos aestus abhinc via

Pulsa livione
Ac in caeli curia,
Ubi pax et gloria,

Nos tecum repone.