QUAESTIO III.

Utrum hoc principium : Impossibile est idem simul esse et non esse, sit firmissimum ?

Arist. hic cap. 3. text. 8. Alen. ibid. et c. 4. et 5 D. Thom. 4. Met. lect. 6. Albert. ibid tract. 2. cap. 1. Anton. Andr. q. 4. Trombet. q. 5. Fland. quaest. 6. art. 2. et 3. Fons. c. 3. q. 1. Suar. disp. 3. Met. sect. 3. Meurisse lib. 2. Met. cap. i. quaest, 2.

Quod non, tum quia falsum: tum quia aliud notius: tum quia contingit dubitare de eo. Probatio primi, alia opposita possunt inesse eidem: ergo contradictio, cum includatur in aliis, quod contraria possunt, 2. Topic. cap. 10. cuicumque inest genus, et species aliqua sive in praedicatione essentiali, sive denominativa, sed scutum, cujus medietas est alba, et alia medietas nigra est coloratum: ergo denominatur ab aliqua specie coloris, qua ratione ab albedine, eadem et nigredine: ergo simul est album et nigrum, et ita contraria de relative oppositis sic : hoc est duplum ad hoc, ergo duplum ; oppositum consequentis non stat cum antecedente, ergo a simili: hoc est dimidium, ergo est dimidium: ergo idem est dimidium et duplum. Item, aliqua consequentia est bona in qua oppositum consequentis non infert oppositum antecedentis: ergo etc. Probatio antecedentis, tum in uniformi de contingenti, tum in aliis instantiis, lapis videt: ergo aliquid habens oculos videt, tamen ex opposito consequentis non valet. Ad propositum, si oppositum consequentis non infert oppositum antecedentis, potest stare in veritate cum antecedente, et cum quo stat antecedens et consequens, et sic consequens et oppositum consequentis. Quoad secundum, scilicet quod aliquid sit notius isto, probatur 4. hujus, text. com. 16. notior dictio quam opposita negatio, haec est negativa. Item in syllogismo ex oppositis conclusio debet esse notior in falsitate ipsis principiis; conclusio autem negat idem a se, in praemissis autem sumuntur opposita, ergo notius. Item, contingit de eo dubitare. Probatio, omnis cognitio ortum habet a sensu, sed circa omnem cognitionem sensitivam contingit errare: ergo circa intellectivam. Item, contingit scire in universali, et ignorare in particulari 2. Priorum, text. com. 20. ita quod contingit opinari oppositum in particulari, sed illud est contradictorium sciri, ut omnem mulam esse sterilem, et istam non: ergo contingit opinari contradictoria.