89. De IX Gaudiis BMV.

1. Gaude, cuius uterum

decenter ornavit
Et ad opus proprium

sibi coaptavit
Caeli rex et dominus

et, qui te creavit,
Totus novem mensibus

in te repausavit.

2. Stella sole clarior,

gaude, stella maris,
Ex te clarus exiit

radius solaris ;
Singularis gloriae

dono gloriaris,
Dum solem iustitiae,

virgo mater, paris.

3. Pastores accelerant

Bethlehem tendentes,
Verbum, quod audierant,

factum requirentes;
Quaerunt et inveniunt

et invenientes
Te gaudere faciunt,

tibi congaudentes.

4. Sic et magi de longe

veniunt dicentes:
Ubi est, qui natus est?

ad quem venientes
Adorant et offerunt

dona procidentes ;
Laeta magos aspicis

ista facientes.

5. Gaude, cuius brachiis

puer deportatur
Ad templum, cum hostiis

patri praesentatur,
Offertur pro perditis,

sic pater placatur,
Et pax tuis meritis

reis redonatur.

6. Cum Christus ad nuptias

in vinum mutavit
Aquam, quibus hydrias

impleri mandavit,
Signorum primitias

hoc signo monstravit,
Quo primas delicias

mundo propinavit.

7. Ex te, vitae vinea,

botrus vitae natus
Crucis ligno figitur,

dirae morti datus,
Cuius sic te cruciat

crux et cruciatus,
Mire te laetificat

mire suscitatus.

8. Partus tui munere

perit mors consumpta,
Porta patet gloriae

spe vitae resumpta.
Cum de morte rediens

ex morte caro sumpta
Ad paternae dexterae

sedem est assumpta.

9. Quando caeli solium

laeta ascendisti,
Laeta caeli civium

turbis occurristi,
Occurrentem filium

plus laeta vidisti,
Ad cuius consortium

laeta tunc venisti.

10. Iam regina resides

in regno caelorum,
Ubi cunctis praesides

choris angelorum,
O pia pax pectoris,

salus peccatorum,
Esto tui memorum

memor miserorum.

R Per hoc dulce gaudium,
virgo, mater Dei,
Apud tuum filium
esto memor mei.