90 Acta Apostolicae Sedis - Commentarium Officiale

populo, plurimique alii totius Orbis sacrorum Antistites, Studiorum Uni-

versitates, Venerabile Anglorum Collegium et S. Bedae de Urbe innumeri-

que alii, quos inter et acatholici, ut ad Canonizationis honores duo hi

fortissimi martyres elevarentur, suppliciter postularunt.

Beatissimus Pater vota haec benigne ex corde excipiens, Sacrae Huic

Congregationi mandavit, ut ad severam trutinam acta martyrii horum

duorum pugilum cribrarentur; de quo in causa de cultus confirmatione

pertractanda, peculiaris quaestio, utpote in casu tunc temporis lege non

requisita, habita non fuerat. Sacrae Rituum Congregationis Historica

Sectio huic muneri plene satisfecit, summi momenti documenta colligendo,

suoque suffragio illustrando, quibus martyrium tum materiale cum for-

male seu ex parte utriusque victimae, seu ex parte iudicum et Regis, qui

eos morte damnarunt, evidentissime comprobatur.

Alteri vero ex Consultoribus munus fuit demandatum praecipuas colli-

gendi sententias a scriptoribus seu superioris seu recentioris praesertim

aetatis, de nostris prolatas martyribus, ut pateat quo iam nunc consensu

admirentur historici utriusque herois et praeclaram vitam et mortis trium-

phum.

His omnibus comparatis, die 29 proxime elapsi mensis in Generali

Congregatione, cui Ssmus D. N. Pius Papa XI praefuit, Rmus Cardinalis

Raphael Carolus Rossi, Causae Ponens seu Relator, dubium proposuit

disceptandum: An constet de martyrio eiusque causa et de signis seu miraculis

post indultam supradictis Beatis venerationem in casu et ad effectum de quo

agitur. Quotquot aderant Rmi Cardinales, Officiales Praelati et PP . Consul-

tores suum quisque tulere suffragium, quod Beatissimus Pater attente

excepit, iudicium vero suum hac die decrevit pandendum 10 Februarii

anno 1935, Dominica V post Epiphaniam, maioris luminis copiam in re

tanti momenti interim a Deo adprecaturus.

Eapropter Rmos Cardinales Camillum Laurenti, S. R. C. Praefectum,

et Raphaelem Carolum Rossi, Causae Ponentem, nec non R. P. Salvatorem

Natucci Fidei Promotorem generalem meque infrascriptum Secretarium

arcessiri iussit, sacro que religiosissime litato edixit: Ita evidenter constare

de martyrio et causa martyrii Beatorum Ioannis Cardinalis Fisher et Thomae

More, ut, concessa a signis seu miraculis omnique alia opportuna et necessaria

dispensatione, procedi possit ad ulteriora.

Hoc autem decretum promulgari et in acta S. R. C. referri mandavit.

Datum Romae die 10 Februarii a. D. 1935.

C. Card. LAURENT! , Praefectus. L. © S.

A. Carinci, Secretarius.